އަރޮޅި ހޮލިޑޭ ކަޕް 2023 ގެ ފައިނަލަށް ރައިޑާރސް އެފްޓީ އަދި ރޯޅި އެފްސީ ދަތުރުކޮށްފިއެވެ.

މާކުރަތު ސްޕޯޓްސް ކުލަބުން އިންތިޒާމުކޮށްގެން ބާއްވަމުން އަންނަ މި މުބާރާތުގެ މިއަހަރުގެ ފައިނަލަށް ރައިޑާރސް އެފްޓީ  ދަތުރުކުރީ ކުޅުނު އެއްވެސް މެޗަކުން ބަލި ނުވެ، 7 ޕޮއިންޓާއި ފައިދާ 3 ގޯލާކުގައެވެ. އަދި ރޯޅި އެފްސީ މި މުބާރާތުގެ ފައިނަލަށްް ދަތުރުކުރީ ކުޅުނު ތިން މެޗުގެ ތެރެއިން ދެ މެޗުން މޮޅުވެ، ހޯދި 6 ޕޮއިންޓާ އެކުގައެވެ. ރޯޅި އެފްސީއަށްވެސް ފައިދާ 3 ގޯލު ލިބިފައި ވެއެވެ.

އަރޮޅި ހޮލިޑޭ ކަޕް 2023 ފުޓުބޯޅަ މުބާރާތުގެ ފައިނަލް މެޗު ކުޅޭނީ މާދަމާ ހަވީރު މާކުރަތު ރަސްމީ ފުޓުބޯޅަ ދަނޑުގައެވެ. މެޗު ފެށުމަށް ހަމަޖެހިފައިވަނީ ހަވީރު 15:45 ގައެވެ. މާދަމާގެ ފައިނަލް މެޗު މާކުރަތު ސްޕޯޓްސް ކްލަބްގެ ފޭސްބުކް ޕޭޖުން ލައިވްކޮށް ފެނިގެން ދާނެއެވެ.

މުބާރަތުގެ ޕޮއިންޓް ތާވަލަށް ބަލާލާއިރު ތާވަލްގެ އެއްވަނައިގައި މިހާރު އޮތީ ރައިޑާރސް އެފްޓީއެވެ. ރައިޑާރސް އެފްޓީ ތާވަލްގެ އެއްވަނައަށް އަނެއްކާވެސް ޖެހިލީ އިއްޔެ ކުޅުނު މެޗުގައި އެ ޓީމުން ކާމިޔާބުކުރި ހަމައެކަނި ލަނޑާއެކު ޖުމްލަ 7 ޕޮއިންޓާއި ފައިދާ 3 ގޯލާއެކުގައެވެ. ތާވަލްގެ ދެވަނައިގައި އޮތް ރޯޅި އެފްސީއަށް ލިބިފައި ވަނީ 6 ޕޮއިންޓެވެ. ހޮލިޑޭ ކަޕްގެ މިއަހަރުގެ މުބާރާތުގައި އެންމެ ހިތި ތަޖުރިބާއެއް ކުރަންޖެހުނު ޓީމަކީ ސަދަން އެފްސީއެވެ. އެ ޓީމު މުބާރާތާ އަލްވަދާޢު ކިޔާފައިވަނީ ކުޅުނު އެއްވެސް މެޗެއްގައި ލަނޑެއް ނުޖެހި މައިނަސް 4 ލަނޑާއެކުގައެވެ.

މާކުރަތު ސްޕޯޓްސް ކުލަބުން އިންތިޒާމްކޮށްގެން ބާއްވަމުން އަންނަ ހޮލިޑޭ ކަޕްގެ 9 ވަނަ މުބާރާތުގައި މިއަހަރު ޖުމްލަ 4 ޓީމަކުން ބައިވެރިވިއެވެ. މުބާރާތުގައި ބައިވެރިވި ޓީމުތަކުގެ ތެރޭގައި ހިމެނެނީ ރައިޑާރސް އެފްޓީ އާއި ރޯޅި އެފްސީ އަދި ސަދަން އެފްސީގެ އިތުރުން ރުއްގަނޑު އެފްސީއެވެ.

ހޮލިޑޭ ކަޕްގެ މި އަހަރުގެ މެއިން ސްޕޮންސަރ އަކީ އަރޮޅި މޯލްޑިވްސްއެވެ. އިތުރު ސްޕޮންސަރުންގެ ތެރޭގައި ސެޓްލިންކް، ބޮޑު ހިޔާ އިންވެސްޓްމެންޓް، ސަމާލް ކޮންސްޓްރަކްޝަން ޕްރައިވެޓް ލިމިޓެޑްގެ އިތުރުން އަމިއްލަ ފާރާތްތައްވެސް ހިމެނެއެވެ.